Sólblómubandið
MEGD er ikki partur av Sólblómuskipanini, men vísir niðanfyri á, hvør er. Tilber at fáa sólblómusnórin frá teimum.
Hotel Djurhuus
Hotel Djurhuus skrivar, at fyri at stuðla og økja tilvitið um ósjónlig brek, hava tey sett sólblómuátakið í verk.
Víðari siga tey, at øll starvsfólk hava fingið venjing í sólblómuskipanini fyri betri at læra um og skilja ósjónlig brek, og hvussu tey á bestan hátt stuðla teimum, sum bera Sólblómuna. Umframt hetta hava tey sólblómuvørur tøkar til gestir og starvsfelagar við ósjónligum breki.
Hetta er ein liður í at tryggja, at allir gestir skulu kenna seg heima hjá teimum, og at tey arbeiða fyri fjølbroytni, íkveikjan og felagsskapi (DIB).
HK Bussar
MEGD fegnast um, at HK Bussar nú er komið við í Sólblómuskipanina, sum er ætlað ferðafólki, ið hava tørv á vegleiðing og hjálp á ferðini, tí tey hava eitt ósjónligt brek. Við sólblómubandinum síggja starvsfólk hjá HK Bussum alt fyri eitt, at her er eitt ferðafólk, sum kanska tørvar eyka tíð ella hjálp á ferðini. Sostatt kann bandið verða við til at gera tað smidligari hjá tí ferðandi. Við hesum ynskja HK Bussar øllum ferðafólkum eina góða ferð.
Kelda: HK Bussar
Norðurlandahúsið í Føroyum
Norðurlandahúsið er við í sólblómuskipanini, sum stuðlar fólki, ið hava ósjónligar avbjóðingar og skrivar á heimasíðu teirra, at tað ber í sær, at starvsfólk í húsinum hava førleika at hjálpa gestum, ið hava sólblómuband.
Sólblómubandið kunnu øll, sum á onkran hátt hava avbjóðingar, fáa. Við sólblómubandinum vísir tú teimum, at tú kanska hevur tørv á tíð, toli ella hjálp. Sólblómubandið er ókeypis og kann fáast í móttøkuni.
Kelda: Norðurfaldahúsið
Atlantic Airways
Atlantic Airways er nú partur av Sólblómuskipanini, sum er ætlað ferðafólki, ið hava tørv á vegleiðing og hjálp á ferðini, tí tey hava eitt ósjónligt brek. Við sólblómubandinum síggja starvsfólk hjá Atlantic Airways á flogvøllinum og umborð á flogførunum beinanvegin, at her er ein, ið kanska tørvar eyka tíð ella hjálp á ferðini. Sostatt kann bandið verða við til at gera tað smidligari hjá tí ferðandi.
Atlantic Airways er fyrsta fyritøka í Føroyum og fyrsta norðurlendska flogfelag, sum er vorðið partur av Sólblómuskipanini. Øll starvsfólk hjá Atlantic Airways, sum hava beinleiðis samband við ferðafólk, hava fingið vegleiðing í, hvat Sólblóman merkir, og hvat tað inniber, tá ein persónur ber Sólblómubandið; hvat tey skulu taka atlit til og vera uppmerksom uppá.
Sólblómuskipanin og -bandið stava frá 2016, tá flogvøllurin í Gatwick í London vildi finna útav, hvussu tey kundu geva ferðandi við ósjónligum brekum eina betri og trygga ferðauppliving. Spurningurin var við øðrum orðum, hvussu tað ósjónliga kundi gerast sjónligt. Tí kom Sólblómubandið. Ein einføld sólblóma á grønari bakgrund. Diskret, men samstundis sjónligt. Við at bera Sólblómubandið, verður ósjónliga brekið sjónligt, og samstundis signalerar tað á flogvøllinum og sjálvari ferðini, at tað kann vera, at tær tørvar hjálp, tol ella tíð.
Frá fríggjadegnum 28. oktober 2022 kunnu Sólblómubond fáast á skrivstovu okkara á farstøðini á flogvøllinum og við innskrivingardiskarnar. Hevur tú tørv á einum bandi, skalt tú bara venda tær til eitt av starvsfólkunum hjá Atlantic Airways á flogvøllinum, áðrenn tú fert ígjøgnum trygdareftirlitið. Sólblómubandið verður handað uttan spurningar.
Kelda: Atlantic Airways
Betri Trygging
Betri Trygging er nú partur av sólblómuskipanini, og hevur tú eitt ósjónligt brek, sum ger tað trupult at seta teg í samband við tey um tryggingar, so kanst tú nýta okkara sólblómuráðgeving - antin við at ringja, skriva ella biðja um ein fund.
Betri Trygging skrivar á heimasíðu teirra, at „tá ið sólblómulinjan ringir, vita vit, at vit skulu geva okkum betri tíð og gera okkum størri ómak við at lurta og tosa greitt. Vit eru tilvitað um, at samrøðan kann vera trupul fyri teg - og tey, sum tú kemur í samband við, hava øll fingið undirvísing í, hvussu tey lofta tær á bestan hátt.
Á sama hátt, tá ið vit fáa ein sólblómu-teldupost ella tú bíleggur ein sólblómu-fund. So veita vit tær eyka hjálp og stuðul – og geva okkum góða tíð."