MEGD nýggjan aðalskrivara

Seinastu seks árini hevur Ása Olsen røkt starvið sum aðalskrivari og ynskir starvsnevndin í MEGD at takka henni fyri framfýsni, dugnasemi og nærlagni í starvinum. Serliga er tað arbeiðið við skuggafrágreiðingini til ST, sum fylti nógv frá fyrsta degi. Her setti Ása skjótt út í kortið og var ikki bangin fyri at taka við avbjóðingini. Úrslit sást týðiliga í niðurstøðunum, sum seinni vórðu sendar Føroya Landsstýri. Ása hevur eisini verið ein dyggur viðspælari hjá politiska myndugleikanum, sum í fleiri umførum hevur víst henni álit. Hetta hevur verið við til, at MEGD hevur sæð batar á fleiri økjum í samfelagnum.

Í september setir Jónvør Christiansen seg í sessin sum aðalskrivari. Jónvør er útbúgvin sjúkrarøktarfrøðingur og hevur drúgvar royndir bæði sum leiðari og verkætlanarleiðari. Eisini hevur hon seinastu árini eftirútbúgvið seg. Í virkna arbeiðs- og lestrarlívi sínum hevur Jónvør vunnið sær breiðan fakførleika og praktiskar royndir á viðkomandi økjum og hevur eisini royndir at seta fyriskipanir í verki. Jónvør hevur seinastu árini arbeitt við Dygd og Menning í Tórshavnar kommunu.

Við hesum ynskir starvsnevndin í MEGD Jónvør hjartaliga tillukku við starvinum og gleðir seg til gott samstarv, ið heilt víst fer at føra føroyska samfelagið enn longur á javnrættinda leið.

Á myndini eru Tóra við Keldu, forkvinna, og Jónvør Christiansen, aðalskrivari.

Fleiri myndir her: Nýggjur aðalskrivari