'

Kom og hátíðarhald altjóða dag teirra, ið bera brek

november 13, 2018

Aftur í ár skipar MEGD fyri almennum tiltaki á degi teirra, ið bera brek. Tiltakið verður í Norðurlandahúsinum í Føroyum, har serstøk myndaframsýning letur upp 3. desember kl. 15.00.

Hvørt ár verður altjóða dagur teirra, ið bera brek hátíðarhildin um allan heim. Endamálið við degnum er at varpa ljós á umstøðurnar hjá teimum, ið bera brek. Víst verður á, hvussu umstøðurnar kunnu gerast enn betri við teirri vón at ávirka samfelagið soleiðis, at forðingar verða beindar av vegnum.

Tað vóru Sameindu Tjóðir, sum ásettu 3. desember at vera dagur teirra, ið bera brek. ST ásetur eisini hvørt ár eitt yvirskipað evni fyri dagin. Í 2018 er evnið „At geva fólki, ið bera brek, megd og at tryggja inklusjón og javnrætt”.

Í dag búgva 7 milliardir íbúgvar í heiminum. Fleiri enn ein milliard, ella okkurt um 15% av heimsins íbúgvum, liva við onkrum slagi av breki. Í Føroyum siga vit vanliga, at talið er um 10%.

Evnið í ár setur fokus á at geva teimum, ið bera brek, møguleika fyri inkluderandi, rættvísari og burðardyggari menning sum part av teimum 17 Heimsmálunum hjá ST. Yvirskipað verður hugsað um eina javnvág millum búskaparliga, sosiala og umhvørvisliga menning. Heimsmálini hjá ST vísa á 17 mál, sum fyri ár 2030 kunnu skapa ein betri heim. Málini plikta samstundis limalondini at taka øll við.

Í ár hevur MEGD valt at lata upp myndaframsýning við heitinum „Broyt, hvussu tú hyggur og hygg, hvussu tú broytist”. Myndaframsýningin er úrslit av samstarvi millum MEGD og kenda myndamannin Rick Guidotti, sum í september 2018 vitjaði Føroyar. Endamálið við vitjanini var at taka myndir av føroyingum, ið gerandis liva við avbjóðingum. Tær 31 myndirnar á framsýningini eru úrslit av vitjanini.

Myndirnar skulu gjøgnum persónligar søgur fáa í lag samtalur, prát og møguligt kjak um, hvussu vit síggja hvønn annan sum menniskju. Hetta verður gjørt við ynskinum um at broyta mangan upplivaða vanahugsan um fólk, ið hava avbjóðingar og onkuntíð síggja øðrvísi út orsakað av breki, sjúku ella øðrum avbjóðingum.

Á føroyavitjanini varð vitjað á Setrinum hjá lesandi sjúkrarøktarfrøðingum og á Almannaverkinum. Rick tók m.a. myndir á Barnadeildini á Landssjúkrahúsinum, har hann hitti starvsfólk, foreldur og børn, á Skúlanum á Trøðni í Tórshavn, í Tofta Skúla, á Verkstaðnum á Brekku og útibarnagarðinum Fjallafípuni í Klaksvík.

3. desember fer Eyðgunn Samuelsen, landsstýriskvinna, at røða, Rick Guidotti, myndamaður, hugleiðir um visjónina Positive Exposure, Levi Hanusarson letur framsýningina upp og kórið Xperiment syngur.

Uttan stuðlar var verkætlanin als ikki møgulig og vit takka: Sjúkrakassagrunninum, Kiwanis, Pelagos, Tórshavnar kommunu, JFK, BankNordik, Norðurlandahúsinum, Atlantic Airways, Lions Club, Skansi Offshore, Betri, Føroya Bjór, Krúnborg, Norðoya Sparikassa, Myndlist, Vónini og Mentanargrunni Landsins.

Kunning um MEGD og arbeiði teirra: www.megd.fo
Kunning um Rick Guidotti og arbeiði hansara: www.positiveexposure.org

Tiltakið er ókeypis og øll eru vælkomin.

Seinastu tíðindi

Visjónin Positive Exposure

desember 6, 2018

Eyðgunn Samuelsen, landsstýriskvinna, helt røðu 3. desember

desember 6, 2018

Røðan, ið Eyðgunn Samuelsen, landsstýriskvinna, helt 3. desember

desember 6, 2018

Altjóða dagur teirra, ið bera brek

desember 6, 2018