Nýggjasta
Samtyktu broyting í kommunu- og løgtingsvallógini
Sambært ST-sáttmálanum um rættindi hjá einstaklingum, ið bera brek, hava Føroyar skyldu at tryggja, at fólk, ið bera brek, fult og heilt fáa verið við í politiskum og almennum lívi á jøvnum føti við onnur, beinleiðis ella umvegis umboð, tey sjálv velja sær.
Myndin er lænt av vp.fo.
Í dag samtykti Føroya Løgting lógaruppskot um at broyta løgtings- og kommunuvallógina.
Vísandi til, at tað er ein mannarættur at kunna velja til løgtings- og kommunuval, fegnast MEGD um, at áheitanin varð gingin á møti.
Tí við lógarbroytingini verður skarin av persónum, sum hava valrætt og eru valbærir til kommunuval, víðkaður til eisini at fevna um persónar, sum eru undir verjumáli og hava mist løgræði eftir verjumálslógini § 6.
Lógarbroytingin hevur eisini við sær, at ein veljari, sum einsamallur ikki er førur fyri at greiða atkvøðu á ásettan hátt, kann krevja, at annar av persónunum, sum veitir honum hjálp, skal vera ein persónur, sum hann sjálvur vísir á.
MEGD heitti í hoyringsskrivinum á Føroya Løgting um at gera somu broyting í stýrisskipanarlógini, so persónur, sum er undir verjumáli og hevur fingið rættarliga myndugleikan frátiknan eftir verjumálslógini § 6, eisini fær valrætt til løgtingsval.
Vónandi verður hetta við tíðini eisini gingið á møti.
Seinastu tíðindi
MEGD vitjar skúlan á Trøðni
Dagstovnalógin
Gávur kunnu gleða – men rættindi skulu skipast og fíggjast
