Nýggjasta
Við vón um eitt gevandi tingár
juli 29, 2021
Fyrst fer MEGD at ynskja øllum eina góðu ólavsøku. Eftir tekstaða og teknmálstulkaða gudstænastu í Havna kirkju í dag, varð tingið sett. Bárður á Steig Nielsen helt ólavsøkurøðu løgmans við heitinum „Trivnaður, tryggleiki og vøkstur”.
Jens Kristian Vang tók myndina, tá ið ólavsøkan 2021 varð sett - við teknmálstulki.
Tað er hvørt ár forvitnisligt at hoyra røðu løgmans, tí her greiðir hann frá støðu landsins og tí, sum ætlanin er at halda fram við og at fremja í komandi tingár.
Áhugavert verður eisini at fylgja við umrøðuni av røðuni á tingfundinum týsdagin 3. august.
Við nøkrum brotum niðanfyri úr røðu løgmans, ið eru viðkomandi fyri brekøkið, gleðir MEGD seg til gott og mennandi samstarv við allar politisku flokkarnar komandi tingár.
- Bústaðir hava fingið út móti hálvari milliard at byggja fyri komandi árini. Av hesum skal umleið helvtin brúkast til at fíggja búfelagsskapir til fólk við serligum tørvi, barnaverndarstovnar og lestrarbústaðir.
- Royndarskipan við ókeypis sálarfrøðiligari viðgerð og hjálp til ung er sett í verk. Skipanin er longu nógv brúkt, so tørvurin er stórur.
- Vit endurskoða fólkaskúlalógina, dagføra tíma- og lærugreinabýtið og raðfesta arbeiðið hjá flokslæraranum. Trivnaðurin í fólkaskúlanum skal eisini raðfestast, tí tá ið eitt barn ikki trívist, verður verri at læra.
- Ung við sálarligum avbjóðingum skulu hjálpast til at megna eina miðnámsútbúgving, serbreytin á miðnámi skal bjóðast út fleiri staðir og Rásin verður liðugt útbygd og fer at kunna taka 14 næmingar inn árliga.
- Fróðskaparsetrið skal støðugt mennast.
- Yrkisútbúgvingarnar skulu mennast.
- Útgreinað verður skjótari fyri demens, víðkað virksemið við MR-skannara, og vit hava hækkað játtanina til ADHD viðgerðarstovu.
- Saman við Novo Nordisk grunninum vilja vit geva diabetikarum betri viðgerð.
- Góð viðgerð krevst somuleiðis, tá ið vit av ymsum orsøkum missa førleikar. Tí fáa hesi nú fleiri nýggj tilboð um at endurvenja og endurmenna seg. Endurvenjingin er vegurin inn aftur í lívið.
- Tá ið sjúka er staðfest, ræður um at fáa skjóta viðgerð. Við viðgerðartrygdini skal eingin bíða eftir viðgerð longur enn 30 dagar.
- Sett verður í verk ein skipan við sorgarfarloyvi. Soleiðis kunnu foreldur, sum missa barn yngri enn 18 ár, syrgja í friði uttan at stúra um mista inntøku.
- Tey, sum gerast langtíðarsjúk, mugu tryggjast betur. Tí leingja vit tíðarskeiðið, har tú kanst fáa dagpening.
- Vit skulu virða verkfallsrættin, men verandi støða er ikki haldgóð. Her skal ein betri loysn finnast.
Seinastu tíðindi
Norðurlendskur fundur um íverksetan av ST-sáttmálanum
apríl 18, 2024
Vælferð í einum óstøðugum heimi
apríl 4, 2024
Ivamál í lógaruppskotinum um fosturtøku
mars 20, 2024
Tað er sum havi eg tveir føðingardagar
mars 8, 2024