Á flog við Atlantic Airways

Hósdagin 29. september varð fylgjaraavtalan millum Atlantic Airways og MEGD endurskoðað og undirskrivað. MEGD takkar fyri vælvild við vón um, at fylgjarakortið dúgliga verður nýtt.

Í seravtaluni millum MEGD og Atlantic Airways stendur, at fylgjari fær 50% í avsláttri av galdandi almannakunngjørda ferðaseðlaprísinum hjá tí ferðandi, sum hevur MEGD fylgjarakort, og avslátturin verður givin á øllum rutum hjá
Atlantic Airways.

Keyp av ferðaseðlum við serprísi, broytingargjøld og keyp av eyka tænastum, t.d. vistveiting, eyka viðføri, seturval v.m. er ikki fevnt av avsláttrinum í hesi avtalu. Avslátturin er treytaður av, at tann ferðandi kann skjalprógva, at viðkomandi hevur fylgjarakort frá MEGD. Somuleiðis er avslátturin treytaður av, at fylgjarin ferðast á somu fráferðum sum ferðandi við fylgjarakorti frá MEGD.

Um ferðandi við fylgjarakorti frá MEGD skal vera uttanlands í longri tíðarskeið (til dømis skal í skúla og má hava ein fylgjara at hjálpa sær at koma til og frá skúlanum), fær fylgjarin 50% í avsláttri av ferðaseðlaprísinum. Treytin er, at tann ferðandi við fylgjarakorti er við á út- ella heimferðini sama dag, sum fylgjarin, ella at fylgjarin ferðast út og heimaftur sama dag ella í seinasta lagi dagin eftir. Um fylgjarin steðgar longur, verður vanligur prísur goldin fyri tað strekkið, har tann ferðandi við MEGD fylgjarakorti ikki er við á ferðini.

Ferðaseðlar, fevndir av hesi avtalu, kunnu bert bíleggjast beinleiðis frá Atlantic  Airways á telefon 341000 ella booking@atlantic.fo. Avgreiðslugjald verður ikki tikið fyri bíleggingar gjøgnum fylgjaraskipanina hjá MEGD.

MEGD takkar Atlantic Airway fyri vælvilja og ynskir øllum, ið gagnnýta hendan møguleika, góða ferð.

Les meira um fylgjarakortið her.