Nýggjasta
Samskipandi eindin farin til verka
Í gjár var MEGD fyri fyrstu ferð á fundi við samskipandi eindina, sum skal tryggja, at sáttmáli sameindu tjóða um rættindi hjá einstaklingum, sum bera brek, virkar í verki á øllum økjum.
Hvørt landsstýrisfólk hevur ábyrgd av, at sáttmálin er settur í verk á sínum øki og hevur tilnevnt lim í samskipandi eindina, sum hevði sín fyrsta fund í apríl.
Á heimasíðuni hjá Almannamálaráðnum stendur at lesa, at landsstýrisfólkini eru á einum máli um, at tað er av stórum týdningi, at hetta arbeiðið verður samskipað millum ráðini, so allir okkara borgarar fáa eins góðar sømdir og møguleikar at taka lut í dagsins samfelag.
Yvirskipaða endamálið við samskipandi eindini er at tryggja samanhang í brekpolitisku ætlanum landsstýrisins. Samskipandi eindin fer at umrøða forðingar í samfelagnum hjá fólki, ið bera brek, at virka á jøvnum føti við onnur, eins og eindin fer at taka upp brekpolitiskar spurningar við áhugafelagsskapir og onnur viðkomandi.
Uppgávan hjá limunum í samskipandi eindini er at tryggja, at politikkir, skipanir og reglur o.a. á teirra øki eru í samsvari við sáttmálan.
Samstundis fer samskipandi eindin at orða eina brekpolitiska virkisætlan fyri Føroyar, ið fevnir um øll rættindi og týðandi øki, sum sáttmálin fevnir um.
Limirnir í samskipandi eindini eru:
Páll Holm Johannesen, Løgmansskrivstovan
Egon Joensen, Fíggjarmálaráðið
Hanna í Horni, Uttanríkis- og vinnumálaráðið
Andras Marr Poulsen, Fiskimálaráðið
Frida Poulsen, Mentamálaráðið
Kristianna Larsen á Lofti, Heilsu- og innlendismálaráðið
Barbara Álvsdóttir Thomsen, Samferðslumálaráðið
Jákup Andrias Kristiansen, Almannamálaráðið
Jeanette Ellefsen Blaasvær, Almannamálaráðið, sum eisini er forkvinna
Hetta er eitt frambrot á brekøkinum í og við, at MEGD, við støði í niðurstøðunum frá ST-nevndini frá 2014, hevur víst á tørvin á eini slíkari samskipandi eind innan miðfyristitingina.
Serliga hugagott var tí at merkja áhugan frá limunum á fundinum, og MEGD ynskir samskipandi eindini blíðan byr við vón um gevandi samstarv.