Ynskja okkum breiðar politiskar semjur

Fleiri viðkomandi drøg

Fleiri viðkomandi drøg eru í samgonguskjalinum millum Javnaðarflokkin, Tjóðveldi og Framsókn.

Millum annað verður nevnt at:

• Langtíðarætlanir við ítøkiligum málum og visjónum verða lagdar á heilsuøkinum.
• Arbeiðast skal støðugt við at skapa ein rúmligan arbeiðsmarknað, har fólk við skerdum arbeiðsførleika hava møguleikar og umstøður at virka
• Avgerð verður tikin um, hvørji serlæknaøki skulu mennast í heilsuverkinum, og greið mál verða sett fyri, hvussu tørvurin á serlæknum innan sjúkrahúsverkið og kommunulæknaskipanina verður nøktaður.
• Avbjóðingarnar í kommunulæknaskipanini skulu loysast, soleiðis at øll hava egnan kommunulækna.
• Nýskipan skal fremjast saman við kommununum fyri at tryggja sama tænastustig um alt landið og fyri allar borgarar.
• Vit skulu í felag tryggja, at borgarar fáa samanhangandi viðgerðargongd, og samstarvið millum ymisku geirarnar – heilsuverk, almannaverk og eldrarøkt – verður styrkt.
• Røktarfólk og fakfólk í heilsuverkinum skulu støðugt kunna eftirútbúgva seg.
• Átøkini fyri betri fólkaheilsu verða styrkt.
• Universitetssjúkrahús verður skipað við heilsuvísindaligari gransking og førleikamenning.
• Møguleiki skal vera fyri at taka partar av læknaútbúgvingini í Føroyum.
• Sálarligar og kropsligar sjúkur verða javnsettar.
• Økispsykiatriin verður styrkt og víðkað, og læknavaktin skal styrkjast til at kunna taka sær av fólki, ið brádliga gerast álvarsliga illa fyri sálarliga.
• Bíðilistarnir í øllum heilsuverkinum skulu styttast.
• Arbeitt verður víðari við ætlanum at við lokalari dialysuviðgerð.
• Allar tænastur, sum almannaverkið veitir, skulu hava brúkaran í miðdeplinum.
• Øll, ið hava tørv á serligari tænastu, skulu hava eitt akkersfólk.
• Skipanin við teirri góðu tilgongdini skal eftirmetast og víðkast.
• Í samráði við kommunurnar vera endaligu markamótini millum land og kommunur ásett fyri fólk, sum eru undir 67 ár og hava serligan tørv og varandi sjúku, og sum í dag detta niður ímillum skipanirnar.
• Fyritíðarpensionistum verður tryggjað eftirløn.
• Endurvenjing og viðlíkahaldsvenjing verður raðfest, so at krøvini og endamálsorðingin í lógini um almannatrygd kunnu haldast.
• Peningur skal fylgja við lógini um almannatrygd og tænastur.
• Tørvurin á bústovnum til fólk ið bera brek skal nøktast, og bústovnar skulu byggjast kring alt landið. Alt eftir tørvi.
• Langtíðarætlan skal gerast fyri tey komandi tíggju árini.
• Loysn skal finnast á trupulleikunum við umlætting og frítíðartilboðum til fólk ið bera brek.
• Miðað verður eftir, at øll fáa viðgerðar- og stovnstilboð í Føroyum.
• Eitt brekumboð skal setast skjótast gjørligt, og ein brekpolitisk ætlan skal gerast.
• Atkoma í samfelagnum – eisini talgild atkoma – skal tryggjast øllum, ið hava skerdan førleika.
• Fólk, ið hava skerdar samskiftisførleikar, skulu hava tilboð um hjálp.
• Sama skulu normeringar á dagstovnaøkinum og serøkið við markamótum.
• Samgongan vil skipa eftirútbúgvingar og aðra førleikamenning av leiðslum, námsfrøðingum og starvsfólki annars.
• Eykaflokkur av námsfrøðingum verður tikin upp.
• Skúlarnir fáa størri frælsi at skipa skúladagin.
• Vit vilja raðfesta flokslæraraleiklutin og styrkja tvílæraraskipan í grunddeild.
• Vit vilja stytta skúladagin og endurskoða lærugreinabýtið og ynskja at lækka talið av næmingum í hvørjum flokki.
• Regluligur eftirútbúgvingarleistur verður skipaður fyri starvsbólkar skúlans.
• Meira gransking skal skipast á skúlaøkinum.
• Øll menniskju hava rætt til og krav upp á menning, læring og skúlagongd.
• Skúlin á Trøðni verður dagførdur.
• Førleikastovurnar í skúlunum og á Sernámi skulu samskipast, og kannast skal, um sálarfrøðingur kann gerast partur av førleikastovunum, umframt at samstarvið við heilsufrøðingar skal mennast.
• Leikluturin hjá Sernámi á barnagarðsøkinum og í fólkaskúlanum verður eftirmettur, so at uppgávubýti og fígging fylgjast.
• Tænasturnar á serøkinum skulu miðspjaðast.

Vit bjóða okkum fram

Vit í MEGD eru fús og bjóða okkum fram sum viðspælarar og ráðgevar hjá øllum viðkomandi pørtum, harundir politiskum flokkum, um avjóðingar og loysnir á brekøkinum. Tey 24 limafeløgini, við fleiri enn 4000 limum tilsamans, eru virkin hvør á sínum øki og hava til endamáls at varpa ljós á avbjóðingar og loysnir, sum eisini eru týðandi partur av arbeiðinum. Tí hevur tað eisini týdning, at limafeløgini verða tikin við upp á ráð fyri at tryggja, at vælferðin verður umboðandi, rímilig og skynsom.